Қазіргі заманда білім мен ғылым қарқынды дамып келеді. Осыған байланысты бірнеше тілді меңгеру әрбір жас үшін маңызды болып отыр. Сондықтан көптілді білім беру мәселесі бүгінгі күні өзекті тақырыптардың біріне айналды.
Көптілді білім беру дегеніміз не? Бұл – адамның бірнеше тілді меңгеруіне мүмкіндік беретін білім жүйесі. Қазақстанда қазақ, орыс және ағылшын тілдерін оқытуға ерекше көңіл бөлінеді. Себебі бірнеше тіл білу адамның білімін кеңейтіп, жаңа мүмкіндіктерге жол ашады.
Неліктен көп тіл білу маңызды? Біріншіден, тіл білген адам әлемнің әртүрлі елдерінің мәдениетімен таныса алады. Екіншіден, шетелдік ақпараттарды еркін оқып, білімін арттырады. Үшіншіден, еңбек нарығында бәсекеге қабілетті маман болуға мүмкіндік алады. Кейбір адамдар: «Басқа тілдерді үйрену ана тіліміздің дамуына кері әсер етпей ме?» деген сұрақ қояды. Бұл сұраққа жауап ретінде айтарымыз – жоқ. Егер адам өз ана тілін құрметтеп, жақсы меңгерсе, басқа тілдерді үйрену оған кедергі болмайды. Керісінше, білім көкжиегін кеңейтеді.
Студенттердің пікірінше, ағылшын тілін білу халықаралық бағдарламаларға қатысуға және шетелдік әдебиеттерді оқуға көмектеседі. Ал мұғалімдер көптілді білім берудің оқушылардың ойлау қабілетін дамытатынын атап көрсетеді. Менің ойымша, көптілді білім беру – заман талабы. Дегенмен, әр азамат ең алдымен мемлекеттік тілді жетік меңгеруі керек. Ана тілін құрметтей отырып, өзге тілдерді үйрену – табысты болашақтың кепілі.
Қорытындылай келе, көптілді білім беру жастарға үлкен мүмкіндіктер береді. Білімді, бәсекеге қабілетті ұрпақ тәрбиелеуде оның маңызы зор.
