Соңғы уақытта жол-көлік оқиғаларының саны азаймай тұр. Күні кеше Қарағанды қаласында қайғылы жағдай орын алып, студент қызды көлік қағып кетті. Куәгерлердің айтуынша, оқиға болған жерде көше шамдарының жанбауы жүргізушінің жолды анық көруіне кедергі келтірген. Бұл жағдай қоғамда үлкен алаңдаушылық туғызды.
Өкінішке қарай, кейбір мәселелер тек қайғылы оқиғалардан кейін ғана назарға алынады. Жол бойындағы жарықтандыру жүйесі үнемі бақылауда болуы тиіс. Көше шамдары уақытылы жанып тұрса, жүргізушілер де, жаяу жүргіншілер де өзін қауіпсіз сезінер еді. Қараңғы көшелер адам өміріне қауіп төндіреді.
Дегенмен, қауіпсіздік тек мемлекеттік органдардың ғана емес, әрбір азаматтың жауапкершілігі екенін ұмытпауымыз керек. Жүргізушілер белгіленген жылдамдықты сақтап, жол белгілеріне мұқият қарауы қажет. Ал жаяу жүргіншілер арнайы өткелдерден өтіп, жол қозғалысы ережелерін қатаң ұстануы тиіс.
Адам өмірінен қымбат ештеңе жоқ. Сондықтан жергілікті билік жолдарды жарықтандыру жұмыстарын жүйелі түрде жүргізіп, қауіпсіздік шараларын күшейтуі қажет. Ал тұрғындар жол мәдениетін қалыптастырып, ережелерді сақтауға жауапкершілікпен қарауы керек.
Жол қауіпсіздігі – бір күндік науқан емес, күн сайын назар аударуды қажет ететін маңызды мәселе. Қайғылы оқиғалардың алдын алу үшін жол шамдары әрдайым жанып тұрып, барлық қатысушылар жол ережелерін мүлтіксіз орындауы тиіс. Сонда ғана біз адам өмірін сақтап, қауіпсіз қоғам құра аламыз.
Ақерке НҰРБОЛАТ
Е.А.Бөкетов атындағы ҚарҰЗУ
Филология факультетінің 3 – курс студенті
