Екі мәрте Кеңес Одағының Батыры Талғат Бигелдинов атындағы Қарағанды республикалық «Жас Ұлан» мектебінің оқушылары «Айбын» Х Халықаралық әскери-патриоттық жастар жиынының жеңімпаздары мен Гран-при иегерлері атанды.
Жастардың әскери-патриоттық жиыны Алматыдағы Құрлық әскерлері Әскери институтының «Әли» оқу-жаттығу орталығында өтті және №1 Кеңес Одағының Батыры, Халық қаһарманы, Қазақстанның тұңғыш Қорғаныс министрі, армия генералы Сағадат Нұрмағамбетовтың туғанына 100 жыл толуына орайластырылды. Жиын барысында Әзербайжан, Беларусь, Қазақстан, Қырғызстан, Ресей және Өзбекстан командаларынан 750 жас өрен үздік команда атағын сарапқа салды. «Жас Ұлан» республикалық мектептері арасында әскери қолданбалы спорт түрлерінен өткен жарыстардың қорытындысы бойынша қарағандылық оқушылар «Айбын дарыны» зияткерлік сайысында және пневматикалық винтовкадан ату бойынша жеңімпаз атанып, бірінші орынды иеленсе, тартылу және пулеметті құрастыру және бөлшектеу спортынан екінші орын. Әскерилендірілген эстафета мен арқан тартудан үшінші орынды иеленген. Жинақ ережесіне сәйкес, бас жүлде өз номинациялары бойынша үздік командалар қатысқан «Күшіміз бірлікте» финалдық ойынының жеңімпазына беріледі. Бұл экстремалды бәсекеде Қарағанды қаласындағы Талғат Бигелдинов атындағы республикалық «Жас Ұлан» мектебінің командасы жеңіске жетті. Бұл команданың капитаны «Айбын-2024» Х халықаралық әскери-патриоттық жастар жиынының Гран-приімен марапатталды.«Жас Ұлан» мектептері арасындағы командалық жарыста 1 орын алғаны үшін қарағандылық оқушыларға велосипедпен жүруге сертификат, жарыстың Гран-при жүлдесі үшін құрал-жабдықтармен жабдықталған спорт сыныбына сертификат берілді. Қарағандыда жеңімпаздарды «Астана» өңірлік қолбасшылығының әскери қызметкерлері, «Жас ұлан» мектебінің офицерлері мен педагогикалық ұжымы және оқушылардың ата-аналары салтанатты түрде қарсы алды.
« – Құрметті біздің тәрбиеленушілер, сендерхалықаралық деңгейде мықты және біртұтас команда екендіктеріңді дәлелдедіңдер, жауынгерлік рух пен өз күштеріне сенімділік таныттыңдар. Сіздердің жеңістеріңіз мектептің, ата-аналарыңыздың, бүкіл облысымыздың мақтанышы», – деді Қарағанды «Жас Ұлан» республикалық мектебінің бастығы, подполковник Жанат Бағжанов оқушыларды жеңістерімен құттықтады.
Жеңімпаздардың ата-аналарына балаларын отансүйгіштік рухта тәрбиелеп, олардың мектеп қабырғасында білім алуына сенім артқандары үшін «Жас ұлан» ЖҚ-ның басшысы алғыс хаттар табыс етті.
