«Астана» өңірлік қолбасшылығына қарасты, 31775 әскери бөлімінің аумағында Кеңес Одағының батыры, тәуелсіз Қазақстанның тұңғыш қорғаныс министрі, Халық Қаһарманы, армия генералы Сағадат Нұрмағамбетовтың 100-жылдық мерейтойына орай, тұңғыш министрге ескерткіш тақта орнатылды және аталмыш әскери бөлім құрылған жылы әскерге аттанып, батыр атанған 27-азаматтың аты жазылған ескерткіш тақта ашылды.
Бұл іс-шара барысында 203-атқыштар дивизиясының қалыптасу тарихы туралы баяндалды. Дивизия 1942 жылы Кубань өңірінде, Лабинск, Курган және Михайлов станицаларында құрылған. Сол жылдың 31 мамырында 203-атқыштар дивизиясына жауынгерлік тулар тапсырылып, бұл күн дивизияның құрылған күні ретінде тарихта қалды. Дивизия Ұлы Отан соғысында ұрыс даласында даңққа бөленді. Алғашқы шайқасын Сталинград түбінде өткізді. Сталинград шайқасында дивизия жауынгерлері ерліктің, қайсарлықтың және батырлықтың үлгісін көрсетті. Барлық сарбаздар «Сталинградты қорғағаны үшін» медалімен марапатталды. Соғыс жылдарында дивизия 8000 шақырымнан астам жолды ұрыспен еңсеріп, 20-дан астам өзеннен өтті. Жүздеген ауылды, ондаған қаланы, оның ішінде Запорожье, Никополь, Одесса және Брно сынды ірі қалаларды азат етті. Жау әскерінің 55 мыңнан астам сарбазы мен офицері жойылып немесе тұтқынға алынды. Сонымен қатар 167 танк, 559 зеңбірек, 616 миномет, 19 ұшақ, мыңдаған көлік және басқа да техниканы қолға түсірді. 1943 жылы 14 қазанда Запорожье қаласын азат ету операциясындағы шеберлігі үшін дивизияға «Запорожье» құрметті атағы берілді. 1944 жылы 8 ақпанда Никополь қаласын азат ету кезінде көрсеткен ерлігі үшін дивизия Қызыл Ту орденімен марапатталды. Ал 1945 жылы 17 мамырда дивизияға Суворов ордені II дәрежесі беріліп, оның атына «Хинган» атауы қосылды. Соғыс жылдарында дивизия 27 Кеңес Одағының Батыры мен «Даңқ» орденінің 6 толық кавалерін тәрбиелеп шығарды. 27 мыңнан астам жауынгер орден-медальдармен марапатталды. Соғыс аяқталған соң, 1954 жылы дивизия Алматыға ауыстырылып, Түркістан әскери округінің құрамына кірді.
Сол жылдары 203-дивизияда қызмет еткен Сағадат Нұрмағамбетов кейіннен Қазақстан Республикасының тұңғыш Қорғаныс министрі атанды. 1969 жылы дивизия Қарағандыға көшірілді. 1989 жылы дивизия қайта құрылымдалып, әскери техника мен қару-жарақты сақтау базасына айналдырылды. 2004 жылы 31 желтоқсанда дивизия жеке механикаландырылған бригада болып қайта құрылды.
Бүгінгі таңда әскери бөлімнің жеке құрамы ұлы батырлар мен ардагерлердің ерлігін мақтан тұтып, олардың жауынгерлік дәстүрлерін лайықты түрде жалғастыруда. Бұл іс-шара тек өткенді еске алумен шектелмей, жаңа ұрпақты Отанға деген сүйіспеншілікке, бірлік пен тәуелсіздікті бағалауға шақырады. Қарағандыда ашылған бұл аллея Ұлы Отан соғысының батырлары мен Сағадат Қожахметұлы Нұрмағамбетовтың есімін мәңгі есте сақтауға арналған маңызды қадам болды.
– Қарағанды қаласында ашылған бұл Даңқ аллеясы – батырларымыздың ерлігін, олардың даңқты жолын мәңгі есте сақтауға бағытталған игі бастама. Сағадат Қожахметұлы Нұрмағамбетовтың есімі ел тарихындағы маңызды тұлғалардың қатарында. Ол тек Қазақстан Республикасының тұңғыш Қорғаныс министрі ғана емес, сонымен қатар жауынгерлік рухты, ерлікті ұрпаққа насихаттаушы тұлға. Бүгінгі таңда әскери бөлімдеріміздің сарбаздары мен офицерлері Ұлы Отан соғысы батырларының ерлігін лайықты жалғастыруда. Әскери дайындық, патриоттық тәрбие, мемлекетке адал қызмет ету – біз үшін басты құндылық. Бұл аллея жаңа ұрпаққа үлкен тәрбие мектебі болары анық. Батырларымыздың есімін еске алып, олардың ерлігін дәріптеу – ел бірлігі мен тәуелсіздікті нығайтудың негізі. Қарағандыдағы бұл шара ел үшін қызмет етудің ең асыл үлгісін көрсетуімен ерекше. Біздің мақсатымыз – өткенді ұмытпай, болашаққа бағдар беру. Ұрпағымыздың жүрегінде Отанға деген сүйіспеншілік ұялату үшін осындай шаралардың маңызы зор. Сағадат Нұрмағамбетов пен Ұлы Отан соғысының басқа да батырларының даңқты жолы мәңгілікке жалғасатынына сенемін, дейді – «Астана» өңірлік қолбасшылығы әскерлерінің қолбасшысы – Ержан Ыбыраев.
